॥ श्री कनकधारा स्तोत्रम् ॥ अंगं हरेः पुलकभूषणमाश्रयन्ती । भृंगांगनेव मुकुलाभरणं तमालम् ॥ अंगीकृताखिलविभूतिरपांगलीला । मांगल्यदास्तु मम मंगलदेवतायाः ॥१॥ मुग्धा मुहुर्विदधती वदने मुरारेः । प्रेमत्रपाप्रणिहितानि गतागतानि ॥ मालादृशोर्मधुकर इव महोत्पले या । सा मे श्रियं दिशतु सागरसम्भवायाः ॥२॥ विश्वामरेन्द्रपदविभ्रमदानदक्षम् । आनन्दहेतुरधिकं मुरविद्विषोऽपि ॥ ईषन्निषीदतु मयि क्षणमीक्षणार्धम् । इन्दीवरोदर सहोदरमिन्दिरायाः ॥३॥ आमीलिताक्षमधिगम्य मुदा मुकुन्दम् । आनन्दकन्दमनिमेषमनंगतन्त्रम् ॥ आकेकरस्थितकनीनिकपक्ष्मनेत्रम् । भूत्यै भवेन्मम भुजंगशयांगनायाः ॥४॥ बाह्वन्तरे मधुजितः श्रितकौस्तुभे या । हारावलीव हरिनीलमयी विभाति ॥ कामप्रदा भगवतोऽपि कटाक्षमाला । कल्याणमावहतु मे कमलालयायाः ॥५॥ कालाम्बुदालिललितोरसि कैटभारेः । धाराधरे स्फुरति या तडिदंगनेव ॥ मातः समस्तजगतां महनीयमूर्तिः । भद्राणि मे दिशतु भार्गवनन्दनायाः ॥६॥ प्राप्तं पदं प्रथमतः खलु यत्प्रभावात् । मांगल्यभाजि मधुमाथिनि मन्मथेन ॥ मय्यापतेत्तदिह मन्थरमीक्षणार्धम् । मन्दालसं च मकरालयकन्यकायाः ॥७॥ दद्याद्दयानुपवनो द्रविणाम्बुधाराम् । अस्मिन्नकिञ्चन विहंगशिशौ विषण्णे ॥ दुष्कर्मघर्ममपनिय चिराय दूरम् । नारायणप्रणयिनी नयनाम्बुवाहः ॥८॥ इष्टा विशिष्टमतयोऽपि यया दयार्द्रा । दृष्ट्या त्रिविष्टपपदं सुलभं लभन्ते ॥ दृष्टिः प्रहृष्टकमलोदरदीप्तिरिष्टाम् । पुष्टिं कृषीष्ट मम पुष्करविस्तरायाः ॥९॥ गीर्देवतेति गरुडध्वजसुन्दरीति । शाकम्भरीति शशिशेखरवल्लभेति ॥ सृष्टिस्थितिप्रलयकेलिषु संस्थितायै । तस्यै नमस्त्रिभुवनैकगुरोस्तरुण्यै ॥१०॥ ॥ फलश्रुति ॥ सुवर्णधारास्तोत्रं यच्छंकराचार्यनिर्मितम् । त्रिसन्ध्यं यः पठेन्नित्यं कुबेरसमतां व्रजेत् ॥ धनधान्यसमृद्धिश्च लक्ष्मीप्राप्तिर्न संशयः । दारिद्र्यदुःखनाशश्च भवेदस्य प्रसादतः ॥ भक्त्या पाठं करोत्येव लक्ष्मीः स्थिरा गृहे भवेत् । सौभाग्यं सर्वसम्पत्तिः प्रसन्ना कमलालयाः ॥ ॥ इति श्री कनकधारा स्तोत्रं सम्पूर्णम् ॥